Տոնական բարձր տրամադրություն, ձմեռ պապիկներ,  ձյունանուշեր, հեքիաթի հերոսներ , նվերներ, ժպիտներ, երգ ու պար,պար,բարեմաղթանքներ,  ծափ ու ծիծաղ, ահա այսպիսինն էր օրը Սիսիանի մանուկների համար: Դեկտեմբերի 23-ին  Սիսիանի համայնքի ղեկավար Արթուր Սարգսյանն իր աշխատակիցների հետ եղավ քաղաքի  4 հիմնական դպրոցներում և 4 նախակրթարաններում: Ավելի քան 1800 երեխաների նվերներ բաժանեց: Կրտսեր խմբի երեխաներին նվիրեց նաև փափուկ թելից գործված գուլպաներ:

 Համայնքի ղեկավարն իր այցերի ժամանակ նկատել էր, որ մանկապարտեզները  գրեթե խաղալիքներ չունեն, երեխաներն իրենք են իրենց հետ  տներից բերում ու դրանցով խաղում:  

,,Մանկապարտեզը նրա համար է, որ երեխան խաղա, անհոգ ու հետաքրքիր առօրյա ունենա, իսկ դրա համար անհրաժեշտ է, որպեսզի մանկապարտեզներում հետաքրքիր հանդեսներից ու պարապմունքներից բացի  առաջին հերթին լինեն  խաղալիքներ: Մեր  մանուկների առօրյան թող լինի գունեղ ու հետաքրքիր , այդուհանդերձ  ուզում եմ  խաղալիքներ նվիրել , որպեսզի  երեխաները սիրով  ու հաճույքով մտնեն մանկապարտեզ,,-, իր խոսքում նշեց  համայնքի ղեկավարը:

Երեխաների երջանկությունն անսահման էր  ստացած նվերների  և մեկը մյուսից հետաքրքիր խաղալիքների համար, դեռ ավելին , նրանցից յուրաքանչյուրն  անհամբերությամբ սպասում է, թե երբ է  կրկին վերադառնալու մանկապարտեզ, որպեսզի խաղա իր նոր խաղալիքներով:

Ծնողներն առավել  քան ուրախ էին:

-Երբ երեխաներն  ուշադրության կենտրոնում են և նրանց մասին այսքան հոգածություն կա, սա արդեն ուրիշ երջանկություն է ,-ասում  էր Մանիկ Խուդոյանը:

-Երեխաների այս երջանիկ ժպիտները, հիացական հայացքներն ու ուրախ բացականչություններն ամեն տեսակի նվերից էլ թանկ են,-ավելացրեց  Սամվելիկի տատիկը:  

Համայնքի ղեկավար Արթուր Սարգսյանը երեխաներին ժպիտներ պարգևելու համար նրանց հետ միասին կանչում էր  ձմեռ պապիկին և ամեն անգամ յուրովի վերապրում այն բարձր տրամադրությունը, որ պատճառում էր փոքրիկներին: Համայնքի ղեկավարը  բոլորին շնորհավորեց գալիք Ամանորի և Սուրբ Ծննդյան տոների առիթով ՝ յուրաքանչյուր ընտանիքի մաղթելով ամրություն, համերաշխություն ու ներդաշնակություն, հույս հայտնելով, որ հաջորդ տարի էլ ձմեռ պապը կհյուրընկալի բոլորին:  

Երեխաները միաբերան շնորհակալություն հայտնեցին համայնքի ղեկավարին և յուրաքանչյուրն իր նվերը գրկած հեռացավ մանկապարտեզից:  

Add comment