Main content

«Հայաստանը բոլորի համար դարձնել գրավիչ և հարմարավետ».  ՀՀ  կառավարության կողմից նախաձեռնված  «Մաքուր Հայաստան» ծրագրի կարգախոսն է: Ծրագրի շրջանակներում կազմակերպված առաջին համապետական շաբաթօրյակը մայիսի 27-ին էր, իսկ երկրորդը՝ հուլիսի 29-ին:
Սիսիանի համայնքապետարանում  շաբաթօրյակի նախապատրաստական աշխատանքները սկսվել էին օրեր առաջ, համայնքի ղեկավար Արթուր Սարգսյանի գլխավորությամբ քննարկվել և աշխատանքային հստակ ծրագիր էր մշակվել, քաղաքը բաժանվել էր համապատասխան հատվածների, բնակչությունը  և շաբաթօրյակի բոլոր մասնակիցները  նախապես տեղեկացվել էին, ստեղծվել էին  պատասխանատու խմբեր:


Շաբաթօրյակին մասնակցում էին  մարզային և համայնքային կազմակերպություններ, տնտեսվարող սուբյեկտներ, կրթական, առողջապահական հաստատություններ, մասնավոր ընկերություններ, հասարակական կազմակերպություններ և քաղաքի մաքրությամբ մտահոգ սիսիանցիներ:
 Համայնքապետարանի աշխատակիցներից կազմված խմբերը համակարգում էին շաբաթօրյակի ընթացքը, հետևում աշխատանքներին, փորձում բոլորին ներգրավել: Աղբահանության աշխատանքները հեշտացնելու և առավել օգտավետ դարձնելու նպատակով, համայնքապետարանի նախաձեռնությամբ,  քաղաքացիներին բաժանվեցին տոպրակներ, պարկեր:
Շաբաթօրյակի ողջ ընթացքին հետևում էր նաև Սիսիանի համայնքի ղեկավար Արթուր Սարգսյանը, շրջայցեր կատարում  քաղաքի տարբեր հատվածներում՝  իր ներկայությամբ խրախուսելով և ոգևորելով համայնքի բնակչությանը:
Համախմբված և կազմակերպված աշխատանքի արդյունքում,  մի քանի ժամվա ընթացքում մաքրվեցին և գեղեցիկ տեսք ստացան  շատ հանրային տարածքներ, պատմամշակութային հուշարձաններ, բակային հատվածներ, ճանապարհների հարակից տարածքներ:
Քաղաքը մաքուր և գրավիչ տեսքի էր բերվել  դեռևս առաջին համապետական շաբաթօրյակի ժամանակ: Այլևս չկան տարիների ընթացքում կուտակված  աղբակույտեր, փողոցները մաքուր են, լուսավորված, ծաղկապատված և կանաչապատ: Քաղաքային իշխանությունների նմանօրինակ վերաբերմունքը փոխել է նաև բնակչության  հոգեբանությունը, վերաբերմունքը քաղաքի նկատմամբ: Դեռ վաղ առավոտից բնակիչները մեծ խանդավառությամբ մաքրում էին շենքերի բակերը՝ իրենց ոգևորությամբ վարակելով  շրջապատին:
Համապետական երկրորդ շաբաթօրյակին ակտիվ մասնակցություն ունեցան նաև Սիսիանում տեղակայված զորամասերի ժամկետային զինծառայողները:

Add comment


1