Մշակույթ

Սեպտեմբերի 8-ին Ազգային պատկերասրահի Սիսիանի մասնաճյուղում ցուցադրվեցին հայ դասական նկարիչների ստեղծագործությունները` նվիրված Վայոց Ձորի և Սյունիքի գեղատեսիլ բնությանն ու տեսարժան վայրերին: <Հայրենի եզերք> խորագիրը կրող ցուցահանդեսում ներառված էին մեծանուն նկարիչներ Հակոբ Հակոբյանի, Արտաշես Աբրահամյանի, Լուսիկ Ագուլեցու, Գրիգոր Ազիզյանի և այլոց աշխատանքները: Ցուցահանդեսը Սիսիան է բերվել  ՀՀ մշակույթի նախարարության կողմից իրականացվող <Մշակութային կանգառ> ծրագրի շրջանակներում:

Երկու տարեկան Նարեն հայրիկի՝  խեցեգործ վարպետ Վահագն Համբարձումյանի ամենակրտսեր աշակերտուհին է, նա իր փոքրիկ թաթիկներով, հմուտ վարպետին վայել վստահությամբ, շունչ ու տեսք է տալիս կավին: «Սիրում է»,-ասում է մայրը, ով մեծ հպարտությամբ է հետևում փոքրիկի շարժումներին:

Օգոստոսի 24-ին Ազգային պատկերասրահի Սիսիանի մասնաճյուղում հյուրընկալողի դերում երեխաներն էին, առիթը՝  «Ամառային դպրոց» ծրագրի շրջանակներում, իրենց կողմից արված նկարների ցուցադրությունը:
Ամռան ամիսներին Ազգային պատկերասրահի Սիսիանի մասնաճյուղում կազմակերպվել էր «Ամառային դպրոց»՝ Հայ ավետարանական եկեղեցու և Սիսիանի չորս նախակրթարանների ավագ խմբի սաների մասնակցությամբ: «Ամառային դպրոցն» ունեցել է շուրջ 308 այցելու, երեխաները հաճախել են խումբ-խումբ, յուրաքանչյուր խումբ պատկերասրահում անցակցրել է երկու օր՝ մասնակցելով տնօրինության կողմից կազմակերպված միջոցառումներին:

Սիսիանցի երիտասարդ նկարչուհի, արվեստագետ Արգինե Սահակյանին շատերն են ճանաչում: Նրա ստեղծագործություններին ծանոթ են նաև Հայաստանի սահմաններից դուրս: Արգինեն բազմաթիվ հնարավորություններ է ունեցել Սիսիանից դուրս ապրելու, ստեղծագործելու և, միգուցե, «ավելի շատ գնահատվելու» համար, սակայն նրա երազանքներն ու ծրագրերը կապված են հարազատ բնօրրանի՝ Սիսիանի հետ: 

Հայրենի բնությունն է նրա արվեստի կենսատու աղբյուրը, սահյանական պոեզիան է նրա  «ճախրանքի» ներշնչանքը, հայրենի հողից ստացած ուժով է արվեստագետը սահմաններ հաղթահարում ու դեպի վեր բարձրանում:

Երիտասարդների միջազգային օրվան ընդառաջ, Սիսիանի քաղաքային գրադարանի նախաձեռնությամբ և Սիսիանի համայնքապետարանի աջակցությամբ,  Օգոստոսի 10-ին մշակույթի կենտրոնի դահլիճում կազմակերպվել էր Եղիշե Չարենցի 120-ամյակին նվիրված գրական-երաժշտական ցերեկույթ:

Օգոստոսի 7-ին, երիտասարդության օրվան ընդառաջ, Համո Սահյանի անվան Սիսիանի քաղաքային մշակույթի կենտրոնի թատերական խմբի սաները սիսիանցի հանդիսատեսին իրենց փայլուն ելույթով թատերական տոն պարգևեցին: Մշակույթի կենտրոնի բեմում էր խմբի ղեկավար Աննա Հակոբյանի բեմադրած «Ախ,ներվեր,ներվեր» կատակերգությունը:  Խմբի 12  սաների մասնակցությամբ Գրիգոր Տեր-Գրիգորյանի համանուն ստեղծագործությունը ներկայացվեց յուրովի՝ փոփոխված, համալրված ժամանակակից տարրերով, ծիծաղաշարժ իմպրովիզներով:

Սիսիանի համայնքապետարանի նախաձեռնությամբ երիտասարդների միջազգային օրվան ընդառաջ կազմակերպվող միջոցառումները շարունակվում են:
Հուլիսի 22-ին  Համո Սահյանին նվիրված հուշ- ցերեկույթով մեկնարկած միջոցառումների շարքը  օր օրի հաջողությամբ համալրվում է, դառնում  բազմաժանր և  միմյանցից տարբերվող:
Սկզբնական շրջանում երիտասարդների պասիվ մասնակցությունը կազմակերպիչների մոտ մտավախություն էր առաջացրել. կամ միջոցառումները  երիտասարդներին չեն հետաքրքրում,  կամ  էլ Սիսիանում երիտասարդների շարքերը նվազել են: Բարեբախտաբար  թե մեկը,  թե մյուսը սխալ կանխատեսումներ էին: Զգալով համայնքապետարանի աջակցությունը և իրենց մտահղացումները կյանքի կոչելու պատրաստակամությունը՝ մի խումբ ակտիվ երիտասարդներ ոչ միայն սկսեցին մասնակցել միջոցառումներին, այլև  հանդես եկան մի շարք  նախաձեռնություններով. կիթառի երեկոներ, դիսկոտեկ, արշավ և նորաոճ party -ներ:

Հուլիսի 25-ին, Սիսիանի մշակույթի կենտրոնում երիտասարդության միջազգային օրվան ընդառաջ կազմակերպվող միջոցառումների շրջանակներում, համայնքապետարանի նախաձեռնությամբ կայացավ Համո Սահյանի անվան քաղաքային մշակույթի կենտրոնի ժողովրդական գործիքների անսամբլի համերգը:
Նպատակը մեկն էր՝ երիտասարդությանը մեկ անգամ ևս ներկայացնել մերը , ազգայինը, կոտրել այն կարծրատիպը, թե այսօրվա երիտասարդությանը չի հետաքրքրում ժողովրդական երգարվեստը: Ինչը, եթե ոչ երգը կարող է այդչափ անմիջական ազդեցություն ունենալ մարդկային հոգու վրա՝ ոգևորել,  ուրախացնել, հուզել կամ տխրեցնել: Առանձնահատուկ ու ինքնատիպ ազդեցություն ունի ժողովրդական, աշուղական երգն ու երաժշտությունը:

Սիսիանի համանքապետարանի նախաձեռնությամբ հուլիսի 23 ին, երիտասարդների միջազգային օրվան նվիրված միջոցառումների շրջանակում , Սիսիանի կենտրոնական հրապարակում տոնվեց Վարդավառը: Սիսիանցի երիտասարդները ավանդական ջրջնոցիով, մանկական խանդավառությամբ նշեցին տոնը: Նրանց էր միացել նաև համայնքի ղեկավար Արթուր Սարգսյանը: Երիտասարդական ավյունը միշտ առաջնորդող է և ոգևորիչ...

Սիսիանը երիտասարդացել է:

 

 

Օգոստոսի 12-ը երիտասարդության միջազգային  օրն է: 1999 թվականին ՄԱԿ-ի կողմից հաստատված ամենամյա այս տոնը աշխարհում առաջին անգամ  նշվել է  2000 թվականի օգոստոսի 12-ին:
Սիսիանի համայնքապետարանի նախաձեռնությամբ՝ տոնն այս տարի մեկ օրով չի սահմանափակվի և կնշվի մեծ շուքով. երիտասարդների համար կկազմակերպվեն մի շարք միջոցառումներ, տոնական երեկոներ: Միջոցառումների ցանկը կազմվել է համայնքապետարանում ակտիվ երիտասարդների հետ անցկացված քննարկումների արդյունքում, առաջարկները նրանցն են:

Հուլիսի 16-ին Դիլիջան քաղաքի ամֆիթատրոնում կայացավ «Մինորա» մշակութային կենտրոնի կողմից կազմակերպված «Դիլիջան  2017» երաժշտական փառատոնը, որին մասնակցում էին Վրաստանից, Ռուսաստանի Դաշնությունից,  Արցախից և Հայաստանի տարբեր մարզերից ժամանած պարային խմբեր: