Մշակույթ

Մայիսի 16-ին Սիսիանի պատմության թանգարանի բակում «Թանգարանների գիշեր» միջոցառման օրը լուսանկարներ են ցուցադրված: «Երբ պատմում են լուսանկարող աչքերը» խորագրով ցուցահանդեսի հեղինակը Նելլի Արսենյանն է:

Աշխատանքները հանրության դատին հանձնելու միտքը նրա գլխում վաղուց էր պտտվում: Այդ հարցում Նելլիին աջակցելու պատրաստակամություն հայտնեց Ծովինար Պետրոսյանը: «Տիկին Պետրոսյանը ինձ վստահեց, իմ գործին հավատաց եւ ինձ համար նման կարեւոր հնարավրություն ընձեռեց»,-ասում է Նելլին: 

«Մոտ կանգնեք թանգարանին, այցելելով այստեղ՝ ցանկացած մեկդ կհեռանա հոգեպես հարստացած եւ բավարարված»,- դիմելով ներկաներին՝ ասում է Ծովինար Պետրոսյանը:

Մայիսի 27-ին կայացավ Սիսիանի երաժշտական դպրոցի 2014-2015 ուստարվա հաշվետու համերգը։ Ելույթ ունեցան կրթօջախի բոլոր բաժինների լավագույն աշակերտները։ Դպրոցի փոխտնօրեն Գայանե Վարդանյանի խոսքով՝ տարին հաջողություններով լի էր։ 9 աշակերտներ հանդես են եկել տարբեր մրցույթ-փառատոնների և վերադարձել հաղթանակած։  «Վերածնունդ» միջազգային փառատոնին մասնակցած Սուսաննա Հունանյանը էստրադային ջազ երգեցողության համար արժանացել է դափնեկրի կոչման։ Եղեռնի զոհերի հիշատակին նվիրված մարզային մրցույթում առաջին մրցանակի են արժանացել Սուսաննա Հունանյանը, Նարինե Իսկանդարյանը։

 Սիսիանի երաժշտական դպրոցում կայացավ կրթօջախի ջութակի դասարանի սան Գարեգին Գրիգորյանի մենահամերգը։ Վերջին ժամանակներս Գարեգինի կատարումները համաքաղաքային միջոցառումներում մեծ հիացմունք են առաջացնում հանդիսատեսի շրջանում։ Դասատու Գայանե Վարդանյանի խոսքով՝ Գարեգինը սիրում է գործիքը ու հաճույքով է պարապում, ուստի զարմանալի չէ, որ ոչ վաղ տարիքից երաժշտական դպրոց հաճախած տղան կարճ ժամանակում կարողացավ սահուն տիրապետել ջութակին։ Նախորդ տարի մասնակցել է Գյումրիի «Վերածնունդ» փառատոնին, արժանացել դիպլոմի։ Տարբեր միջոցառումներում շնորհակալագրեր է ստացել։ 

«Ճչացող լռություն». այսպես է անվանել Հայոց ցեղասպանության 100-րդ տարելիցին նվիրված քանդակների ցուցադրությունը նախաձեռնության հեղինակը՝ քանդակագործ, լրագրող, հաղորդավար Լիլի Կարապետյանը: 

«Ցուցադրությունն ինքն էլ գաղթող է, ինչպես գաղթեցին հայերը Հայոց ցեղասպանության ժամանակ,-ասում է Լիլին:- Կարծում եմ՝ քանդակների «գաղթը» հնարավորություն կտա, որպեսզի Հայաստանի շատ քաղաքների բնակիչներ տեսնեն դրանք, հաղորդակցվեն լռության հետ, որը ճչում է: Բոլորս էլ ապրում ենք այդ մեծ ցավը»:

Լիլիի նախաձեռնությունը Սիսիանում իրականություն է դառնում քաղաքապետարանի օժանդակությամբ: Սիսիանցիները քանդակագործի հոգու մարմնավորված ցավի հետ՝ բրոնզաձույլ վեց քանդակների տեսքով, հնարավորություն ունեն հաղորդակցվելու ընդամենը երեք օր: 

2015 թվականին «Ճչացող լռություն»-ը կշրջի հանրապետության համայնքներով, բայց ոչ վեց աշխատանքներով: Քանդակագործն աստիճանաբար կավելացնի դրանց թիվը: Յոթերորդ քանդակը շուտով պատրաստ կլինի:

Շուրջ 300 ցուցանմուշ, որ պատմում է Հայրենական մեծ պատերազմին սիսիանցիների մասնակցության մասին: Դրանք ռազմաճակատային նամակներ են, ճակատային մամուլում լույս տեսած հոդվածներ, փաստաթղթեր, լուսանկարներ, պատվոգրեր, շքանշաններ, մեդալներ, անձնական իրեր: Այս ամենը Մեծ հաղթանակի 70-ամյակի առիթով ցուցադրվում է Սիսիանի պատմության թանգարանում: 

«Ոչ միայն զենքով»․ ազգային պատկերասրահի Սիսիանի մասնաճյուղում ցուցադրվում են նրանց աշխատանքները, ովքեր Արցախյան ազատամարտի օրերին վրձինը, գրիչն ու մատիտը փոխարինեցին զենքով, արվեստագետի իրենց կոչումը` հայրենիքի պաշտպանի սուրբ առաքելությամբ: Սիսիանցի ազատամարտիկների շրջանում ստեղծագործողների թիվը շատ ավելի մեծ է, սակայն այս պահին ներկայացված են նրանցից 6-ը՝ Վարդան Ղազարյանը, Վալերիկ Ստեփանյանը, Աղվան Մինասյանը, Արտաշես Եսայանը, Աշոտ Ավագյանը և Գրիգոր Գրիգորյանը: Նրանցից որոշներն այսօր ֆիզիկապես մեզ հետ չեն, սակայն մարտադաշտում նրանց սխրանքն ու ստեղծագործություններից բխող էներգիան նրանց հավերժ մեր ուղեկիցն են դարձնում։

«Ցեղասպանության բնութագրումը մշակույթի միջոցով» ծրագրի շրջանակում ցուցահանդես է կազմակերպվել Սիսիանի գեղարվեստի դպրոցում։ Կրթօջախի 70-ից ավելի սաներ նկարների, կավագործ ու թելագործ աշխատանքների միջոցով ներկայացրել են իրենց պատկերացումները Ցեղասպանության մասին։

Նախաձեռնությունը «Զանգեզուրի երիտասարդական ասոցիացիա» ՀԿ-ինն է, որի ծրագիրը հավանության է արժանացել ՀՀ նախագահի աշխատակազմի կողմից հայտարարված  «Ցեղասպանություն և մշակույթ» խորագրով դրամաշնորհային մրցույթում։

Ապրիլի 14-ին Սիսիանի Համո Սահյանի անվան մշակույթի կենտրոնի բեմում Երեւանի փոփոխությունների թատրոնի դերասանները ներկայացնում էին «Պատմություն բաց ծովում» ինտերակտիվ բեմականացումը: Նախաձեռնությունը «Գորիսի կանանց զարգացման ռեսուրս կենտրոն» հիմնադրամինն էր, ֆինանսավորումը կատարել է Ասիական զարգացման բանկը:

Հանդիսատեսը մեկ շնչով բեմականացումը դիտելու հնարավորություն չուներ, այն ժամանակ առ ժամանակ ընդհատվում էր՝  հադիսատեսի խոսքն ու կարծիքը լսելու համար:   

Ջոկերը, ում դերում հանդես էր գալիս Արսեն Գրիգորյանը, նշում է, որ Սիսիանում հնչած կարծիքներն ու տեսակետները շատ են ու հետաքրքիր: Դերասանին զարմացրել է սիսիանցի հանդիսատեսի ակտիվությունը:

Ապրիլի 8-ին «Մշակութային կրթության աջակցության» հիմնադրամի նախաձեռնությամբ Կապանում տեղի ունեցավ Հայոց ցեղասպանության 100-րդ տարելիցին նվիրված երաժշտական մրցույթ-փառատոն:

Էմմա Ասյանի անվան Սիսիանի երաժշտական դպրոցից այդ փառատոնին մասնակցեցին 5-7-րդ դասարանների 7 սաներ:

Նրանցից 4-ը մրցույթում արժանացան պատվավոր տեղերի:

Դպրոցի 7-րդ դասարանի սան Նարինե Իսկանդարյանը հաղթող ճանաչվեց մրցույթում:

Ապրիլի 7-ին Սիսիանի Համո Սահյանի անվան քաղաքային մշակույթի կենտրոնի դահլիճում համերգային ծրագրով նշվեց Մայրության եւ գեղեցկության օրը: Նախապես ծրագրված երգացանկում ընդգրկված էին նաեւ մեր հայրենակից աշուղ Երամի երգերից:

Սիսիանի քաղաքապետարանի եւ մշակույթի կենտրոնի նախաձեռնությամբ համերգին հրավիրվեց նաեւ հեղինակը: Աշուղը  սիրով ընդունեց հրավերը եւ աշուղ Աստղանուշի հետ սիսիանցի կանանց շնորհավորելու եկավ:

Աշուղն իր խոսքն ուղղեց սիսիանցի կանանց եւ աղջիկներին՝ Ապրիլի 7-ի կապակցությամբ: «Ժողովրդական երգը ժողովրդի սրտում է, այն մոռանալ հնարավոր չէ»,-նշեց աշուղը:

Սիսիանի Էմմա Ասյանի անվան երաժշտական դպրոցի դահլիճում Ավետիսյանական տրամադրություն էր: Անուշ Վարդանյանի ղեկավարած վոկալի բաժնի 24 երեխաներից 10-ը ներկայացնում էին կատարումներ Խաչատուր Ավետիսյանի երգացանկից: